ചെങ്ങന്നൂർ: മരം വെട്ടുന്നതിൽ പരുക്കേറ്റ് തൊഴിലാളി മരത്തിൽ കുടുങ്ങി. ചെറിയനാട്, കടയിക്കാട്, അറയ്ക്കൽ അനീഷ് 40 ആണ് അപകടത്തിൽ പെട്ടത്. ഇന്നലെ വൈകിട്ട് 4.15 ഓടെയാണ് സംഭവം .വെൺമണി ആശ്രമപ്പടി വരമ്പത്തേത്ത് അശോകൻ്റെ പറമ്പിലെ പ്ലാവ് മരം വെട്ടുന്നതിനിടയിലാണ് അത്യാഹിതം .60 അടി പൊക്കമുള്ള പ്ലാവിൽ 40 അടി ഉയരത്തിൽ
അനീഷ് കയറി ചില്ലകൾ കോതി വടം ഉപയോഗിച്ച് താഴേക്ക് ഇറക്കുന്നതിനിടയിലാണ് വടം കാലിൽ കുടുങ്ങിയത്. ഇതോടെ അസ്ഥി പൊട്ടി രക്തം വാർന്നൊലിക്കുകയും ചെയ്തു. കൂടെ ഉണ്ടായിരുന്ന മറ്റ് ജോലിക്കാർ അവശനിലയിലായ അനീഷിനെ മരത്തിൽ കെട്ടിവച്ച ശേഷം വിവരം ഫയർഫോഴ്സിസിനെ അറിയിച്ചു. ചെങ്ങന്നൂർ ഫയർഫോഴ്സ് എത്തി ഏണിയും വലയും ഉപയോഗിച്ച് അനീഷിനെ താഴെ ഇറക്കി കൊല്ലകടവിലെ സ്വകാര്യ ആശുപത്രിയിൽ പ്രവേശിപ്പിച്ചു. അവിടെ പ്രഥമ ശുശ്രൂഷ നൽകിയ ശേഷം കോട്ടയം മെഡിക്കൽ കോളേജ് ആശുപത്രിയിലേക്ക് മാറ്റി. ഫയർഫോഴ്സ് ഉദ്യോഗസ്ഥരായ പ്രമോദ് കുമാർ ,രതീഷ് മോഹൻ ,ധനേഷ്, ശരത്ചന്ദ്രൻ ,നന്ദു, രജ്ഞി ഇ.രവി, ഹോം ഗാർഡ് ഗോപകുമാർ എന്നിവർ രക്ഷാപ്രവർത്തനത്തിന് നേതൃത്വം നൽകി.
